ប្រែសម្រួល៖ស-សម្បត្តិ

បាងកក៖ កម្មករថៃចំនួនប្រាំនាក់ ដែលត្រូវបានដោះលែងបន្ទាប់ពីត្រូវបានចាប់ជាចំណាប់ខ្មាំងនៅហ្គាហ្សាអស់រយៈពេលជាងមួយឆ្នាំ បានមកដល់ទីក្រុងបាងកកនៅថ្ងៃអាទិត្យ (ថ្ងៃទី៩ ខែកុម្ភៈ)។

លោក សារុសាក់ រុមណាវ អាយុ៣២ឆ្នាំ លោក វ៉ាចារ៉ា ស្រីអ៊ូន អាយុ៣៣ឆ្នាំ លោក សាធៀន សុវណ្ណខាំ អាយុ៣៥ឆ្នាំ លោក ផុងសាក់ ថៃអិនណា អាយុ៣៦ឆ្នាំ និងលោក បាណាវ៉ាត សែថាវ អាយុ២៧ឆ្នាំ ត្រូវបានដោះលែងកាលពីថ្ងៃទី៣០ ខែមករា ក្រោមកិច្ចព្រមព្រៀងដោះដូរ។

ពួកគេគឺជាក្រុមចំណាប់ខ្មាំងជនជាតិថៃលើកទីពីរដែលត្រូវបានដោះលែង ចាប់តាំងពីសង្គ្រាមផ្ទុះឡើង។

ក្នុងអំឡុងពេលបញ្ឈប់បាញ់កាលពីខែវិច្ឆិកា ឆ្នាំ២០២៣ ជនជាតិថៃចំនួន២៣នាក់ត្រូវបានដោះលែងក្រោមកិច្ចព្រមព្រៀងចរចារវាងប្រទេសថៃ និងក្រុមហាម៉ាស់ ដោយមានជំនួយពីប្រទេសកាតា និងអ៊ីរ៉ង់។

បុរសទាំងប្រាំនាក់ត្រូវបានពិនិត្យសុខភាពនៅមន្ទីរពេទ្យមួយក្រៅទីក្រុងតែល អាវីវ មុនពេលត្រឡប់មកវិញ។

បុរសបួននាក់ក្នុងចំណោមពួកគេមានសាច់ញាតិម្នាក់ៗមកជាមួយកាលពីដើមសប្តាហ៍នេះ។

ការធ្វើដំណើរនេះត្រូវបានឧបត្ថម្ភដោយរដ្ឋាភិបាលអ៊ីស្រាអែល នេះបើយោងតាមស្ថានទូតថៃនៅទីក្រុងតែល អាវីវ។

ក្រុមយុទ្ធជនហាម៉ាស់បានចាប់ជនជាតិថៃចំនួន៣១នាក់ជាចំណាប់ខ្មាំងក្នុងអំឡុងពេលវាយប្រហារភាគខាងត្បូងអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ ដែលធ្វើឱ្យពួកគេក្លាយជាក្រុមចំណាប់ខ្មាំងបរទេសដ៏ធំបំផុត។

កម្មករកសិកម្មជនជាតិថៃជាច្រើនរស់នៅក្នុងបរិវេណនៅជាយក្រុងភាគខាងត្បូងនៃកីប៊ូតស៊ីម និងទីក្រុងអ៊ីស្រាអែល ហើយក្រុមយុទ្ធជនហាម៉ាស់បានវាយលុកទីតាំងទាំងនោះជាមុន។

ជនជាតិថៃសរុបចំនួន៤៦នាក់ត្រូវបានសម្លាប់ក្នុងជម្លោះនេះ រួមទាំងជនជាតិថៃពីរនាក់ដែលត្រូវបានសម្លាប់ក្នុងពេលវាយប្រហារ ហើយសាកសពរបស់ពួកគេត្រូវបានយកទៅហ្គាហ្សា នេះបើយោងតាមក្រសួងការបរទេសថៃ។

មិនមានព័ត៌មានភ្លាមៗអំពីលោក ណាត្តាផុង ពីងសា ដែលជាចំណាប់ខ្មាំងជនជាតិថៃចុងក្រោយនៅសល់ក្នុងហ្គាហ្សា ក៏ដូចជាកម្មករថៃពីរនាក់ដែលសាកសពត្រូវបានយកទៅហ្គាហ្សាដែរ។

រដ្ឋមន្ត្រីការបរទេសថៃ លោក ម៉ារីស សាញ្ញាមផុងសា បានធ្វើដំណើរទៅអ៊ីស្រាអែលដើម្បីទៅសួរសុខទុក្ខបុរសទាំងប្រាំនាក់ដែលត្រូវបានដោះលែង មិនយូរប៉ុន្មានបន្ទាប់ពីការដោះលែង។

លោក ម៉ារីស បានជួបជាមួយសមភាគីអ៊ីស្រាអែលរបស់លោក ដើម្បីស្វែងរកការគាំទ្រក្នុងការធានាការដោះលែងចំណាប់ខ្មាំងជនជាតិថៃដែលនៅសល់ និងទាមទារយកសាកសពជនជាតិថៃពីរនាក់ដែលបានស្លាប់។

កម្មករថៃនៅតែជាក្រុមកម្មករកសិកម្មបរទេសដ៏ធំបំផុតនៅអ៊ីស្រាអែល។

ប្រទេសទាំងពីរបានអនុវត្តកិច្ចព្រមព្រៀងទ្វេភាគីកាលពីមួយទសវត្សរ៍មុន ដែលជួយសម្រួលដល់កម្មករកសិកម្មជនជាតិថៃជាពិសេស។

កម្មករប៉ាឡេស្ទីនជាច្រើនបានត្រឡប់មកវិញ ហើយមុនពេលក្រុមហាម៉ាស់វាយប្រហារ កម្លាំងពលកម្មរបស់អ៊ីស្រាអែលប្រហែលពាក់កណ្តាលគឺជាកម្មករបរទេស និងកម្មករប៉ាឡេស្ទីន៕

ប្រភព៖ AP/ht